Ang Bagong Elsa sa Barrio Cupang
Saturday, October 21st, 2006
Ako si Elsa (Ching!) at muli akong nagbalik sa Barrio Cupang hindi upang sumigaw ng “ walang HIMALA”! kung sino man ang nakapanuod at nakaaalala ng pelikulang Himala ni Ate Guy malamang may ideya na kayo sa lugar na pinuntahan ko dito sa
Sudan . Well, the community itself can be compared to Cupang not necessarily the place I call “home”. Malungkot, tahimik, halos wala kang ingay na maririnig, bihira ang sasakyan. Madalas makikita mo ang mga donkey na may karay karay na karwahe. Disierto, sobrang nakakapasong init. Alas 7 na ng gabi tirik pa ang araw. Ang alikabok ng pinatuyong putik. Mga barong barong ng mga IDP’s(internally displaced persons) na gawa sa putik na maaring tumigas at tumibay na lamang sa tindi na araw. Ni halos wala kang makitang kulay sa berde sa kapaligiran. Isang malawak na espasyo na puro kalupaan. Maaninag mo ang pagdaharop ng mga tao dito sa itsura ng lugar. Walang bahay aliwan. Patagong pagsasaya at paginom ng alak pwede. May mga mangilan ngilan na restorante, kapag kumain ka dito parang panandalian kang nakalaya sa araw ng paggisa mo ng talong at patatas na may corned beef. Malamig naman sa gabi pero matatakot kang lumabas para magpa presko. Hindi dahil sa aswang kundi sa mga naglipang mga insekto na parang tuwang tuwang nagpi peoples’ power sa liwanag ng mga ilaw. Kakamis ang mga batang naglalaro ng patintero okay, badminton sa kalsada. Mga kapitbahay na nagtsitsimisan ng mga latest na balita tungkol kay kris aquino. At kakamiss mag tagalog. Nagkaroon na nga akong anemia dahil sa pagdugo ng ilong at gilagid. Haaaaaay…pero sa likod na lahat ng ito, “may himala”. Maayos na tirahan, kumpletong kagamitan at naka-aircon na kwarto. Nakakain ng 2-3x sa isang araw (well, by choice ito)! Bente kwatro oras ang tubig at koryente. May cable, internet at oto. Mahimbing na tulog, malinis na tubig. Mga kaibigan dayuhan, iba’t ibang kulay ngunit iisang layunin. Dalawang kakaibang pamumuhay sa iisang lugar. Buhay na buhay si Elsa sa kabila ng mga kalungkutang ito. At hindi totoong walang Himala.
